TOP

Үөһээ Бүлүүгэ улуус эр дьонун форума ыытылынна

Улуус 21 нэһилиэгиттэн күүстээх аҥардар анал дэлигээссийэлэрэ кыттыыны ыллылар.

Үөһээ Бүлүүгэ «Үс хоһуун» спортивнай комплекс саалатыгар полиция отделын, ГАИ, урбаан пуондатын, КУМИ, тыа хаһаайыстыбатын департаменын, налуок иниспиэксийэтин, биэнсийэ управлениетын, дьарыктаах буолуу киинин салайааччылара, исписэлиистэрэ консультациялары оҥордулар, билиһиннэрэр «Үөһээ Бүлүү» хаһыат. Улуустааҕы киин балыыһа быраастара эр дьон доруобуйаларын туругун көрдүлэр-иһиттилэр. Эдэр аҕаҕа сүбэ-ама биэрэр анал оскуола үлэлээтэ. Кинигэ быыстапката үлэлээтэ, дуобат сеанса ыытылынна. Тренажернайга эти-хааны сөпкө эрчийиигэ маастар-кылаастары биэрдилэр.

«Эр киһи — сайдыыны түстүүр күүс» диэн киэҥ ыҥырыылаах улуус эр дьоно кыттыылаах мунньах ыытылынна. Мустубут эр дьону Үөһээ Бүлүү улууһун баһылыга Владимир Поскачин эҕэрдэлээтэ: «Маннык эр дьон түмсэрэ хайаан да наадалаах. Мунньахха бары көхтөөхтүк кыттан инники өттүгэр сайдыыга тугу үлэлиэхтээхпитин санааҕытын ирэ-хоро этиҥ. Быйылгы сыл Сомоҕолоһуу сылынан биллэриллибитинэн бары өссө түмсүөҕүҥ, бары биир санаанан салайтаран үлэлиэҕиҥ. Маннык хабааннаах форуму аны күһүн тэрийиэхпитин наада», — диэтэ.

Бэйэтин санаатын ССРС спордун маастара, Саха АССР хапсаҕайга спордун маастара, Манчаары оонньууларын муҥутуур кыайыылааҕа, алгысчыт, оһуохайдьыт,  сир түннүгэ киһи Николай Корякин — Уран Ньукулайүллэһиннэ: «Бэҕэһээ ыытыллыбыт СӨ ситэриилээх былааһын отчуотугар 2022 сылга Саха сирэ автономияны ылыммыта 100 сыллаах үбүлүөйүн көрсө Олоҥхо ыһыаҕа Үөһээ Бүлүүгэ ыытылларын туһунан бэрт сонуну иһитиннэрбиттэрэ. Онон Үөһээ Бүлүү улууһун эр дьоно өссө түмсэн, иннибитигэр улахан, эппиэтинэстээх тэрээһин күүтэр».

Тэрээһин Сомоҕолоһуу оһуохайынан түмүктэннэ. Үөһээ Бүлүү улууһун эр дьоно Саха сирин эр дьонун Аҕа дойду көмүскээччилэр күннэринэн эҕэрдэлэрин тиэрдэллэр, Сомоҕолоһуу сылыгар бары түмсүөҕүҥ диэн ыҥырыыларын тиэрдэллэр!

Комментарии

Пожалуйста, авторизуйтесь чтобы добавить комментарий.
avatar