TOP

Орто Халыма Налимскайыгар 22 дьиэ ууга барда

Ууга барбыт дьиэ ахсаана элбээн, 12 буолбута. Бу күн улахан дьону тэҥэ 15 оҕо вертолётунан  улуус киинигэр кэлбиттэрэ. Налимскай орто оскуолатыгар тэриллиэхтээх лааҕыр үбүнэн, Орто Халымаҕа «Спектр» оҕо сайдар киинигэр лааҕыр аһылынна.

Нэһилиэккэ Халыма өрүс уута алыынан киириитэ эбиллэн, бэс ыйын 4 күнүгэр уу муҥутуур таһыма 1278 см тиийбитэ. Онон, бэс ыйын 6 күнүгэр 42 дьиэ тиэргэнигэр уу киирбитэ, 22 дьиэни уу олоччу ылбыта. 65 киһи дьиэтэ ууга барда , ол иһигэр 14 оҕо. Итини таһынан 12 акылаат ууга сытыйда.

Учаастактааҕы балыыһа акылаата, оскуола, оҕо саадын тэлгэһэтэ ууга барбыттара. Балыыһа быстах кэмҥэ бэтэрээннэр түмсүүлэрин дьиэтигэр көһөрүллүбүтэ. Үөрэх тэрилтэлэрин тиэргэнин төһө да уу ыллар, оҕо саада үлэтин тохтоппото, оскуоланы бүтэрээччилэр эксээмэннэрин туттараллар. Хочуолунай үлэтин болдьоҕо, сииги тартаран, уһатылынна.

Быстах кэмҥэ дьону олохсутар пуун «Айаан» култуура киинигэр тэриллибитэ даҕаны, дьиэлэрин ууга былдьаппыт дьон аймахтарынан көспүттэрэ.

Нэһилиэккэ икки быыһыыр сулууспа этэрээтиттэн, икки баһаарынай чаастан үлэһиттэр, бэрээдэги хонтуруоллуур сыаллаах ИДьМ Орто Халыматааҕы отделениетын учаскуобайа бааллар. Гидролог күннэтэ уу таһымын кээмэйдиир. Халаан содулуттан тахсыбыт хоромньуну ааҕар хамыыһыйаны сэргэ Дьокуускайтан кэлэ сылдьар хоромньуну ааҕар исписэлиистэр үлэлээтилэр.

Онон, быйылгы халаан нэһилиэккэ элбэх хоромньуну таһаарбытынан, нэһилиэк иһинээҕи Г.Слепцов уонна Лесная уулуссалары тэҥэ, Орто Халыма-Налимскай суолу чөлүгэр түһэрэриини, халаан кэмигэр сүөһүлэри үрдүк сиргэ таһаарар Холчур итиэннэ Арыылаах учаастактары саҥардарыыны, Хаппыт Билии сиэнин ыраастааһыҥҥа үбүнэн көмөлөһүүнү,  ууга олоччу ылларбыт, өрөмүөн туһалаабат буолбут дьиэлээхтэргэ сертификаты, инбэлииттэргэ, тыыл бэтэрээннэригэр, элбэх оҕолоох ийэлэргэ санаторийга, профилакторийга путёвканы, оскуола саастаах оҕолору лааҕырынан хааччыйыыны, хаарбах туруктаах үрдүк күүрүүлээх линиялар өрөмүөннэрин нэһилиэк баһылыга В.П.Оконешников уонна нэһилиэк депутаттарын Сэбиэтэ бырабыыталыстыбаҕа туруорсуохтара.

Бэс ыйын 8 күнүнээҕи туругунан, сарсыарда 8 чааска Налимскай бөһүөлэккэ уу таһыма 1276 см тэҥнэстэ. Берёзовкаҕа уонна Орто Халымаҕа уу кыралаан түһэрэ бэлиэтэнэр. Ол курдук, эмиэ бу чаастааҕы туругунан, Берёзовкаҕа — 946, Орто Халыма куоракка 1247 см буолла.

Сыбаатайга бэс ыйын 5 күнүгэр Алаһыай өрүс барбыта. Уу таһыма кыралаан үрдүүр, бүтэһик суукка аҥарыгар 10 см эбиллэн, бэс ыйын 8 күнүгэр сарсыарда уу таһыма 683 см буолла.

Оттон Арҕахтаахха критическэй таһым 777 см эбит буоллаҕына, бу күн туругунан 722 см тэҥнэстэ.

 Ааптар: Алёна КУДРИНА.

Комментарии

Пожалуйста, авторизуйтесь чтобы добавить комментарий.
avatar